Yağlı dəri haqqında

Yağlı dəri gec qırışma kimi bir üstünlüyə malik olsa da, gündəlik həyatı ən çox çətinləşdirən və adətən yanlış baxımın qurbanı olan dəri tipidir. Balans pozulduğu üçün davamlı olaraq yağ (sebum) istehsal edən dərini müalicə etmək, quru dərini nəm saxlamaqdan çətin deyildir. Gəlin, əvvəlcə yağlanmanın səbəblərinə baxaq, daha sonra yağlı dərinin müsbət, mənfi cəhətləri, qulluq və müalicəsinə nəzər salarıq.

Dərinin həddən artıq yağlanmasının bir çox səbəbi vardır. Siz genetik olaraq yağlanmağa meyilli dəri quruluşu ilə doğula və ya tamamilə xarici faktorların təsirindən bu vəziyyət ilə qarşılaşa bilərsiniz. Dərinin sebum balansını təyin edən əsas faktorlar bunlardır: genetika, iqlim, qidalanma, hormonal vəziyyət, ətraf mühit şəraiti və yaş.

Sebum mayesi normal şəraitdə epidermisi örtərək dərini xarici təsirlərdən qoruyur. Lakin lazım olduğundan artıq istehsal olunduqda yağlı dəri tipi meydana gəlir. Bəs sebum balansı niyə pozulur? Bəzi ümumi səbəblərə nəzər salaq:

• Həddindən artıq isti su ilə yuyulma dərinin qurumasına gətirib çıxarır və bu vəziyyətin öhdəsindən gəlmək üçün dəri daha çox sebum ifraz edir.
• Dəri tipinə uyğun olmayan kosmetik məhsullar dərini qurudur və daha çox yağ əmələ gəlməsinə səbəb olur.
• Hormonal pozğunluqlar sebum balansına mənfi təsir göstərə bilər.
• Doğuşa nəzarət həbləri kimi sintetik hormonların qəbulu səbəbindən dərinin yağ balansı dəyişə bilər.
• Alkoqol və siqaret istifadəsi sebum balansını pozur.
• Yanlış, kifayət qədər olmayan dəri baxımı və məsamə tıxanıqlığı ilə bağlı yaranan qan dövranı və oksigen çatışmazlığı dərinin daha çox yağlanmasına səbəb olur.

İndi isə yağlı dəri tipinin nə kimi zərərləri olduğundan bəhs edəcəyik. Yağlı dərinin tez-tez təmizliyə ehtiyacı var və təmizləndikcə daha yağlı olur. Bu qüsurlu dövranı qırmaq üçün dermatoloq dəstəyi almaq mütləqdir. Yağlı dərinin digər zərərli xüsusiyyətlərini aşağıdakı kimi sıralamaq olar:

• Məsamələr daha geniş olur.
• Sızanaq yaranmağa meyilliyi çoxdur.
• Qara nöqtələr asanlıqla yaranır.
• Burun və çənə nahiyəsində tüklülük müşahidə oluna bilər.
• Dəri qalınlaşmağa meyilli olur.
• Makiyaj qısa müddətli qalır.
• Dəridə kirli görünüş yaranır.

Bütün bunlarla yanaşı yağlı dərinin müsbət cəhətləri də vardır:

• Piy vəziləri aktiv fəaliyyətdə olduğundan dəri daha yaxşı qidalanır.
• Dəri gec qırışdığından uzun müddət gənc görünür.
• Yağlı dəri daha dözümlüdür, asanlıqla zədələnmir.

Yağlı dərinin müalicəsi

Yağlı dərinin müalicəsi ona düzgün qulluqdan keçir. Bu, bir neçə əsas prinsipdən ibarətdir. İlk növbədə onu artıq yağdan təmizləmək lazımdır. Səhər, axşam və idman edirsinizsə, ondan sonra üzünüzü yumalısınız. Dərini qıcıqlandıran və yağ istehsalını stimulə edən həddindən artıq sərt təmizləyicilərdən qaçınmaq lazımdır. Əvəzinə yumşaq, köpüklü üzyuma vasitələrindən istifadə edin. Yanaşı olaraq üzü çox sərt şəkildə ovmamalısınız. Təmizləyiciniz komedogen, qıcıqlandırıcı və allergen olmamalı, həm də dəridən asan yuyulmalıdır. Doğru məhsulları seçmək yağlı dəri üçün olduqca önəmlidir. Aşağıdakı maddələrin klinik sınaqlarda yağı azaltdığı təsdiq olunmuşdur:

• Yaşıl çay
• Niasinamid (B3 vitamini)
• L-karnitin amin turşusu

Məhsullardan istifadə edərkən etiket təlimatlarına əməl edin. Gün ərzində üzünüzə toxunmamağa çalışın. Bunu etmək sızanaq və digər qıcıqlanmalara meyilli bölgələrə bakteriya, kir və daha çox yağ yaya bilər.

Yağlı dərinin ciddi sağlamlıq fəsadlarına səbəb olma ehtimalı az olsa da, utanc yarada və ya özünə inamı azalda bilər. Bu, narahatlıq doğurursa, xüsusilə yuxarıdakı vasitələr istədiyiniz nəticəni vermirsə, bir dermatoloqa müraciət etməlisiniz.

Yağlı dəriyə necə qulluq olunmalıdır?

Yağlı dərinin də nəmləndiriciyə ehtiyacı vardır, xüsusən də dəridən yağı çıxarmaq üçün nəzərdə tutulmuş məhsullardan istifadə edirsinizsə. Məsamələrinizi tıxamayacaq yüngül və komedogen olmayan bir vasitə seçməyiniz məsləhətdir. Eyni şəkildə qeyri-komedogen kosmetikadan istifadə vacibdir. Yatmazdan əvvəl makiyajı təmizləməyi də unutmayın. Üzünüzü ovmanızı və qıcıqlandırmanızı tələb etməyən təsirli bir məhsuldan istifadə edin. Müəyyən maddələri yağlı dəridən uzaq tutmaq lazımdır. Hazırda müxtəlif qiymətli çoxsaylı dəriyə qulluq məhsulları tapmaq mümkündür. Brendlərə güvənmək əvəzinə məhsulun etiket və inqrediyentlərinə diqqət yetirin. Aşağıdakı maddələr yağlı dərini tıxayacaqdır:

• Kakao yağı
• Kokos yağı
• Silikon
• Alkoqol tərkibli məhsullardan da çəkinmək lazımdır, çünki onlar dərini qıcıqlandırır.

Yağlı dəri üçün pilinq

Yağlı dəri üçün ən yaxşı qulluq metodlarından biri pilinqdir. Bu, dərinin çirklərdən azad olması, görünüşünü yaxşılaşdırmağa və həddindən artıq yağ istehsalının qarşısını almağa xidmət edəcəkdir.

Yağlı dəri üçün pilinqin bəzi təbii variantlarına baxaq. Təbii alma sirkəsi müxtəlif dəri xəstəlikləri üçün faydaları olan bir məhsuldur. Onun tətbiqi üçün çox istifadə edilən resept: həssas dəriniz varsa, su ilə yarıbayarı qarışdırmaqdan ibarətdir. Pambıq yastıqcıq ilə bunu üzə çəkin və 10 dəqiqə saxlayıb soyuq su ilə yuyun. Həftədə 2 və ya 3 dəfə tətbiq edin, lakin müntəzəm istifadə etməzdən əvvəl dermatoloqunuz ilə məsləhətləşin.

Badam unu ilə olan növbəti resept belədir: 8-10 ədəd badamı üyüdün. Bir xörək qaşığı bal əlavə edib üzə tətbiq edin. 10 dəqiqə saxladıqdan sonra ilıq su ilə yuyun. Bu, ölü dəri hüceyrələrini çıxarmaq və yağlı dərini balanslaşdırmaq üçün faydalıdır. Həmçinin bir sıra dəri problemlərinə qarşı da əhəmiyyəti vardır.

Yağlı dəri üçün krem və maskalar

Yağlı dəri üçün Vitamin E, hialuron turşusu, B3 vitamini, aloe vera və s. tərkibli kremlərə üstünlük vermək məsləhətdir. Tərkibində parfum və rəngləyici vasitələrin olmamasına diqqət etmək lazımdır. Yağlı dəri üçün asanlıqla hazırlaya biləcəyiniz faydalı maska reseptləri mövcudur.

1) Aloe vera maskası

Aloe vera dəri sağlamlığı üçün əla vasitələrdəndir. Onun büzücü, dərini bərpaedici təsirləri daha çox bilinir. Aloe vera yağlı dəri, yanıq və çapıqlarla mübarizədə faydalıdır. Ənənəvi texnikaya uyğun istifadə etmək üçün sadəcə yarpağından bir hissəni kəsin və üfüqi olaraq açın. Geli çıxarın, birbaşa üzünüzə çəkin. Quruduqdan sonra soyuq su ilə yuyun. Bu müalicəni həftədə iki və ya üç dəfə təkrarlaya bilərsiniz. Bununla belə, müntəzəm istifadə etməzdən əvvəl dermatoloqunuz ilə məsləhətləşmək tövsiyə olunur.

2) Yağlı dəri üçün bal maskası

İçindəkilər:

• 1 yumurta sarısı
• 1 xörək qaşığı bal

Yumurta sarısını ağından ayırıb bal ilə qarışdırın. Barmaqlarınızla dairəvi hərəkətlərlə çəkin. Quruduqdan sonra ilıq su ilə yuyub nəmləndirici krem çəkin.

3) Yağlı dəri üçün bananlı maska

Banan tərkibindəki A, B6, C və E vitaminlərinin yüksək olması səbəbindən yağlı dəri və sızanaqlar üçün əladır. Müalicənin sonunda süd və yulafın təsiri sayəsində dərinizin daha təravətli və yumşaq olduğunu görəcəksiniz.

İçindəkilər:

• 1 banan
• 1 xörək qaşığı süd (10 ml)
• 2 xörək qaşığı yulaf yarması (20 q)

Bananı əzib püre halına gətirin. Otaq temperaturundakı süd və yulafı əlavə edin. Homogen bir qarışıq ​​əldə etmək üçün yaxşıca qarışdırın. Maskanı tətbiq etməzdən əvvəl üzünüzü ilıq su və neytral sabunla yuyun. Barmaqların ucları ilə bütün üzə dairəvi hərəkətlərlə (gözaltı xaric) çəkin və beş dəqiqə masaj edin. Daha sonra soyuq su ilə yuyun və nəmləndirici krem ​​çəkin. Həftədə bir dəfə təkrarlayın.